India ram kya lungmaehueh thaepaw Zo ccungccaw, Ceu Peng (kum 16 lae) Nung paaw hae te thaekuh kho khyh hae
India ram, Meghalaya State, Latambai lungmaehueh thaenaw kya Zo ccungccaw Ceu Peng tuh nung, paaw hae te thaekuh kho vae khyh hae cite ny lan um.
Haekhaw Myo kya umpaw kum (16) paw Ceu Peng kha Haekhaw pe Sakta khua umpaw U Za Ceu (kum 32) nynh India, Meghalaya State, Latambai lungmaehueh thaenaw kalan 2010,2,16 nin kya a hoybuapaw(kobuapaw) nynh thua.
“Kae te vae (3), vae (4) nynh kae thaeku kho, aning nynh hopaw tuh khuaccaaw ae’ nynh pei yn hu hae, yn bua hae zah yn kotupaw Za Ceu nynmah yn hu” a ci cite Mizo ram umpaw Ceu Pen pupaw Peng Uk nynh ho.
“Zekhanin kum December saw kya Ceu Peng kotupaw Za Ceu te vae kheih kae thaeku kho zah ka tupaw kha oun shaw la ka ci zah Rupee 6000) te nynh kae shaw cih” cite a ho, cite Ceu Peng pupaw nynh ho.
“Za Ceu nynh na tupaw kha laebah Rupee (5800) a hoi. Na hoy ry lan thua ze Rupee (6000) te oun hoy la cite phone phe oun pittaw, kae mah teitei lan ka cceihthya khyh, ka vaw phe saw” cite Ceu Peng pupaw nynh bua ho.
Tuh e konglan te a u nung nynh a raepaw Ceu Peng ccung khylan March saw kya Aizawl kyacia pou oun thua slama paw thonpang ny lan um khyh zah pou bua ki ci hae.
Ceu Peng hynh mih innbyng a pui hae paw lu (5) kyaze a soihuapaw thua zah tan (2) cia nynh sia-inn kae cite ho hae.
Tuh e lungmaehueh thaenaw kya Ceu Peng te a bang ae’ lu (2) Zo ccungccaw ae’ zema nung, paaw ae’ te thaeku kho thua vae khyh hae. Tuh e konglan, bawm nawlan Aizawl Myo e (Human Right Law Network) kalan Zekhanin March saw 31 nin kya bawmnaw kae ngiaku cite Ceu Peng pupaw nynh ho
Facebook Comments