Zo Raetapaw Sia-inn kya ccyhlue (Over Time) lante a ccangkupaw ccaw ae’ kha sia-inn kaenaw ccyh ccaccing vae kyatuh sazae/ccazae ae’ nynh siaihmua ae’ kha ccangpya vae khyh hae keiccuaze ccyhlue(OT) kya kae kho bua leipaw siaihmua ae’ tuh ccaw phe ccing lan ccangkuh kho bua vae khyh hae.
“Ccyhlue(OT) kya ccangkupaw ccaw ae’ kha sia-inn ccyh ccaccing vae kyatuh bua ccangpya vae khyh hae keiccuze ccyhlue(OT) kya a kae kho leipaw siaimua ae tuh mih ccaw taening bua vae khyh hae” cite kholae e paw luh kheih nynh a ho.
Sagain Tai, Tamu Myone, Thantapin khua tan (7) cia umpaw accozah sia-inn kyamaw ccyhlue ccaw ccangkunaw kha atu saw mawte siaihmua luh kheih ze sah (1) 2000Ks te a khoi vae hae. Thangtapin sia-inn kyatuh siaihmua mihlu 150 um hae zah ccyhlue kae kho paw siaimua (50) nynh a cih hae. Sia-inn sazaecipaw(Headmaster) nynmah siaihmua ae’ mih nungpaaw ae’ kha luh kha kheih te ko hae zah “nae ccaaw ae’ ccyhlue(OT) nae kae sah cioh, siaihmua luh kheih ze sah (1) 2000Ks te na khoi cioh” cite oun hopya cite siaihmua nungpaaw luh kheih nynh a ho.
Tuh koute phua 2000Ks kha kum kheih hanlan ccanphaw pheih/pia kheih pya lante hotua hae slama sia-inn sazaecipaw nynh phe mya.
Siaihmua ae’ tuh awkhua ccyh 7:00 te 9:00, zete ccyh 3:00 te 5:00 cia ccyhlue phe ccangkuh hae tuh sia-inn sazae/ma ae’ tuh sia-inn ccyh ccaccingpaw kya kha hooyte ccangpya vae khyh hae. Siaihmua ae’ mah mimaw pravet ccyh mangnaw um vae khyh, ninpi blyng sia-inn ccaw te nynh mih vaw saw vae cite ho hae.
Facebook Comments
