Kriccaaw Baebu, Roman Catholic Baebu, Greek Orthodox Baebu Ccauh Laenaw Kong

Zo Raetapaw December 17, 2018 3 min read

1. Kriccaaw(Christian), Roman Catholic te Greek Orthodox hae nynh Baebu ccaryng 39 te ccathaw 27 ablyn mawte phe ccing lang marya hoikalang hae. Genesis kyate tho zah Byaphy (Revelation) cia hynh, abapi Baebu ccauh lante aphu blyn mawte marya a mang hae, a suiluaku te ablyn ccauh hynh 66 phe oun cih. Kriccaaw(Christian) kya tuh ccauh 66 makhae maw nynh Pachia Baebu ccauh langte pouh mang hae, pouh a kyng hae. Thuasalama Roman Catholic te Greek Orthodox aphu hae nynh tuh ccauh 66 kha Pachia Baebu ccauh langte a kyng hae apiaze, a ccangpaw ccauh blyn kha a kyngbia hae. Roman Catholic nynh accangpaw ccauh 13 kha kyng zah, Greek Orthodox tuh Roman Catholic a kyngpaw lae ccauh 4 a lunghua, ablyn ccauh 17 kha a kyng. Tuh e accangpaw ccauh hae tuh laephi vawlan ze, Pachia beihpaw miakaw nynh a nuepaw hae ccauh nynh thua. Tuh e ccauh min tuh mirawbya te Apocrypha cite koo hae. Ablyn nynh marya a mang paw Pachia Baebu ccaryng 39 te ccathaw 27 tuh, ahmeepaw/athyapaw ccauh thua zah, marawbya te Canon cite koo a thua.

2. Roman Catholic te Greek Orthodox hae tuh Apocrypha ccauh blyn kha Canon Baebu ccauh rou mawte marya mangbia hae. Mihmaw nynh tuh; e ccauh hae blyn nynh phungpaw konglan a hobua, a umbua cite a muih hae. Apocrypha ccauh kyate, langmawlya pachia beih hae paw nynh mah reference langte bouh bouh a hothya hae paw a um, a lawthya hae paw a um cite ho hae.

Tuh e keiccuze abang nynh bua hokii hae paw tuh; Apocrypha ccauh hae makhae thua leite, phungpaw konglan um paw ccaccangpaw ccauh patah umkii ung. Tuh e hae blyn tuh pawkeiccu a phangbia khyh hae? cite khiabulehnaw patah oun umkii. Phungpaw konglan a um paw ccauh miakaw te Baebu ccauh lungkhu lang pung phangbia kou lang thua ze, Baebu ccauh tuh myarya a lung vae cih. Langmawlya, reference langte a mangthya hae paw ccauh mah Apocrypha ccauh hae makhae thua khyh, a ccangpaw ccauh hae patah um, tuh e hae blyn tuh pawkeiccu a phangbia khyh hae cite tuanaw patah oun pou.

3. Kriccaaw hae nynh tuh, Apocrypha ccauh hae kha Canon Baebu ccauh lungkhu lang pybia khyh hae, mangbia khyh hae. Pachia nynh hythua pyapaw ccauh thua khyh, Pachia liate pyapaw/zeipaw ccauh thua khyh cite kum saepi cia a vah nung vae hae. The Council of Trent (1546 AD) cia, Apocrypha ccauh hae kha zungnawccaw (officially) te Canon Baebu ccauh lungkhu lang phangbia khylan Roman Catholic maw nynh nawccaw leipaw nynh thua. Abang nynh tuh mang hae salama zungnawccaw (officially) te mang khyh hae. A nuepaw hae ccauh ccazing kalang maw nynh pou vah nungbia hae.

Jew hae nynh mah, Apocrypha ccauh hae kha Hebrew Baebu ccauh ccaryng (OT) kya nungbua khyh hae, vah mangbia khyh hae. Jesu zuetu hae te masaty zyntu hae nynh mah, Baebu ccathaw lungkhu lang vah phangbia khyh hae. Baebu ccathaw (NT 27 books) hynh 250 AD loukaw te Canon Baebu ccauh lungkhu lang marya teebua kou vae. Tuh nin kyacia, Apocrypha ccauh hae tuh Canon ccauh lungkhu lang umbua lakhyh.

4. Apocrypha ccauh hae hynh Pachia Baebu ccauh lungku lang a phangbia leinaw hae konglan tuh; ccaw pyatu/zeitu hae hynh Pachia nynh a mang ccaccing paw hae thua tah ciipaw, hoi te nyh kho khyh hae. Tuh apiaze Ccaw pyatu/zeitu hae nynh mah Pachian nynh oun mang paw cite ccae rarih lang ccaw a pyanaw/zeinaw hae umbang khyh. Apocrypha ccauh lungkhu e ccaw (Scripture) abang mah Pachia bya te a rawsekupaw ccaw (Scripture) hae patah um keiccu nynh thua,

Kriccaaw (Christian Baebu, Roman Catholic Baebu, Orthodox Baebu Ccauh hae;