Zo Raetapaw 
2011 Pokunaw(Election) kya a taekuhbuapaw mingphuin uno phu (5) nynh rang lungkhu daenaw hanlan Daenaw Commission kae rae ry cite Naypyidaw kya July 27 nin khe a ho hae. Naypyidaw kya tuapaw Union Election poi kya hlupi lante athawpaw U Tin Aye te rang ukkunaw hlucceihtu ae’ tungkunaw kya, Mingphuin Uno Phu (5) kyate hlucceihtu Zo Mingphuin Party chairman U Zo Zam nynh tuh e konglan a poukhaepaw nynh thua.
Tuh e Mingphuin Uno Phu (5) kyatuh Karen Phalung-Savaw Democratic Party, Chin National Pary, Mon Democratic Party, Rakhan Development Party te Shan Democratic Party ae’ nynh thua.
Atu ccyh lya maw hynh Kachin, Shan te Karen Pyine ae’ kya Accozah rhawkaw te mingphuin maethe kyngpaw ae’ lahku kya rhawtuhnaw pou um zah khualaeming athong accung te khua-innpaw rang ae’ kalan a rekuh hae.
“Rang lungkhu daenaw laelan azii cihpaw tuh ka nyh khyh, daenaw konglan tuh ho kho leilan cia azii cihpaw nynh thua” cite U Zo Zam nynh a ho.
Tuh nin Election Commission te tungkunaw ccyh hynh sml 3 lungkhu thua zah Mingphuin kalante bya poukhaenaw hynh Mingphuin ccang kheih ze minit (5) makhae nynh ccyh mue hae cite ny lan um.
Tuh e tungkunaw kyatuh malang yn thua cipaw pokunaw(Election) konglan nynh abapi hokheihpaw hae thua, Election Commission chairman thawpaw U Tin Aye nynmah malang e pokunaw(Election) kyatuh ry thyhte hme rarih lan tuapaw pokunaw thua kho nawlan zuaku te rya kae laah cih cite vae (5) cia byakingkunaw bya a ho cite U Zo Zam nynh a ho.
Facebook Comments
