India, Mizo Pyine kya-e Minister Pu Lal Than Hawl nynh Zo mingphuin suiluakunaw kyaze Mizo Pyine te Vae rang lahku rangri nungpaw hynh ka ry khyh cite July 25 nin khe a ho.
Mizo mingphuin mah ninthualang a nuekuhpaw ae’ thua, Sagain Tai, Tahan Myo cia ka cceih bang, tuh e rang ae’ blyng tuh Zo ae’ rang nynh a thua cite Minister paw Pu Lal Than Hawl maw nynh a ho cite The Aizawl Post thongpang ccaw kya a pousah hae.
Zo mingphuin ae’ hynh nin khakheih tuh sang kheih lan bua suiluaku kho ung lan cipaw ngaehoinaw ka hoi cite Assembly Session kya a ho.
Mizo mingphuin ae’ tuh laephivaw lan rangri thyhte Vae, India, Bangladesh rang thong lungkhu kya phiarih phiara lan um ccyh lya Zo mingphuin ae’ bua suiluaku kho ung lan cite Minister paw nynh hopaw tungvaw kya lungtuanaw aleepi ka hoi cite MZP nynh a ho.
Tuhawte ZORO nynmah Minister paw hopaw kya lungtuanaw aleepi ka hoi cite ccauh ccang kheih a pousah. Mizo Pyine te rang takyh lan umpaw ae’ Zo mingphuin blyng nynmah Minister Pu Lal Hawl tungvaw kya lungtua aleepi kae hoi cite thongpang thae lan um.
“Rangriku te um zema uno ae’ nynh ah thua oh, Minister paw nynh hopaw kya zema chiisaw nynh hopaw nynh thua cite ho lanze houh hmehua cih cite Kalay Myo, Zo Mingphuin Beiknaw kya-e Piccangpaw nynh a ho.
Chin Pyine te Sagain Tai, Kalay Kabow kya Zo Mingphuin ae’ te Mizo Pyine kya umpaw Mizo mingphuin ae’ tuh uno ae’ thua thyh hawte ryalawnaw, dooihkunaw, beiknaw lante zema a cceihkheihpaw hae thuanaw hynh kum saepi a ropaw vae nynh thua.
Facebook Comments