American Foreign Ministry kyate thyahawnaw te ziazae ccuepekunaw rae khylan cite The Earth String music band (Law Sahpaw) aphu nynh Asia (rang) pyngpi kya hlaw sah te khiaku lan a paccyngkuh.
Tuh e paccyngkunaw kya mah Vae rang lan blyng ccia te hlaw sah lan a cih hae. The Rhythm Road cite a min phupaw hae, tuh e Hlaw Sah Aphu’ae khuaccungnaw tuh American Foreign Ministry te Jazz at Lincoln Center hae nynh suiluaku te a paccyngpaw hae thua zah Vae rang lan ccia lanpaw hynh mah vae (3) naw nynh thua vae.
Tuh e aphu tuh Laos, Thai, Vae, East Timor te South Korea rang’ae kalan September 8 nin te October 11 nin cia khyccae cceih cih hae cite The Earth String Band website kya a pou sah hae.
The Earth String aphu nynh paccyngkunaw tuh Vae rang lan hynh September 21 nin te 25 nin cia nynh thua cite Thai rang e The Nation thongpang ccaw kya a pya hae.
American Foreign Minister kya-e honaw kaw hoitu nynh; “Bluegrass tahawpaw The Earth String Band tuh Vae rang lan ccianaw Visa mue lan hae thua ze a cceih cih hae” cite August 31 nin khe a ho. Bluegrass cipaw tuh African te American rang kyaze Khua Taraw Hlaw Sahnaw aphing ccang kheih nynh thua.
Bluegrass konglan te tuh Vae rang lungkhu kya a lungry thuapaw ccungccaw myarya a zya ung cih cite hlaw tuatu Myint Moe Aung nynh a ho.
Tuh e American Hlaw Sah aphu The Rhythm Road tuh 2005 kum te tho zah kum kheih ze vae (10) rangtakyh lan ccia te hlaw sah hae cite ny lan um.