Zo Raetapaw 
July 17 nin, USA New York kya pali’ae nynh samanpaw Garner kha kyng hae zah a baa kya meih (choke) hae keiccuze phe chihsah hae.
Tuh e keiccuze atu loukaw New York ccungccaw’ae sandahpiapaw (protester) houhouh oun lung zah, piahccana mah houhouh leethung vae. Ahme te tazae ccuinaw rya oun lawpya oh cite houhouh sia hae. Tazae ccuinaw mah rourou hangthung vae zah, New York Pali’ae mih vaw myarya shaw.
Samanpaw Garner tuh Pali’ae nynh kyng lan a cyi maw hae ze a kuit mah hang zah, oun hae/kyng nang oh cite mah a ngiakuh hae. Pali’ae nynh a baa kya meih hae zah, laephi kya a dydee cciamang hae ccyh kyamaw khe; Ka hy ka shui kho khyh, ka hy ka shui kho khyh, cite a sia paw mah Pali’ae nynh bya lan sahpah khyh hae. Tuh kou mawte a kyng lyaccya hae ccyh kyamaw khe a hy phe thang.
A baa meihtupaw Pali paw nynh, kae tuh ccungccaw chihsanaw lante ka enaw ccapyh mah thua khyh. Ccungccaw halan mee rarih lante rya lawpya hae ka ry, bung ka rypaw nynh thua, atu hawte phe cikuseipaw mah ka ngae myarya thah cite a ho.
Atu hawte nulang ccyh kyamah Pali’ae nynh samanpaw Brown kha vaethei te phe chih lan kaw hae keiccuze New York kyatuh a hoileipaw nynh houhou thuanaw paw hawte mang thua vae.
Maethei te phe chih lan kaw hae paw Brown te Garner konglan hynh Pali’ae nynh pyngkheih lan mawte tazae ccuinaw raepya mangccia hae.
Ref:
