Zo Raetapaw 
Zorang e rhawrekunaw kya um paw hae halan UNHCR nynh bongnaw pya lang cite Mindat Myo kalang oun phu paw hae uhccaw patae kha marya pya kho khyh hae zah, UNHCR kya rya lahtu hae tuh July 22 nin kya bua kii vae hae. Rhawkaw Council nynh UNHCR hae kha rythyh te ccianaw, pyanaw khuin a pya khyh hae keiccuze rhawrekupaw hae patae kha pya kho khyh hae zah, nuhlang bua kii paleih hae.
Rhawkaw Council nynh kawpyanaw te a sah hae paw Mindat Myo kya rhawrekunaw sapangaw (5) kya-e innbyn 66, mihlu 500 han makhae kha nynh bongnaw pyh pya kho hae. Rhawrekupaw alunghua umnaw khua taraw lang tuh Rhawkaw Council nynh ccianaw khuin a pya khyh hae keiccuze uhccaw patae kha nungsya hae zah pou kiitaw vae hae.
Tuh e uhccaw patae hae tuh phungki sia-inn kya pong nungsya kou hae. Nyalang bua oun thua cih paw rhawrekupaw hae pya a thua cih zah, min ccazing law te kae pya cih cite Mindat Myo e nungpaw hae nynh ho hae.
Rhawkaw Council nynh kawpyanaw te a sah paw hae Mindat Myo e rhawrekunaw buu tuh rhawkaw a phu hae te mih vaeeccaw halan umnaw a muin nynh a thua cih, uhccaw balyn mah rhawkaw hae te mih vaeeccaw hae nynh pong hung lawku cih hae cite patae a hokei hae.
