‘Donald Trump’ Nynh White House Kya A Nuetapaw ‘Robert Trump’ Rua Ccyh Mangnaw
Zo Raetapaw 
‘Donald Trump’ nynh atu nin Ninpangaw ninthu sang khe a nuetapaw rua ccynaw kha White House kya nynh ccyh a mangpya. A Vaeccaw hae te hoiccaw nynmah White House kalang khe oun thua kho hae.
‘Robert Trump’ tuh sizung lang a thua te paw cciinaw cipaw tuh hoi te ho khyh hae zah, nin pangaw nin, August 15 nin khe a chih. A kum tuh 71 a cih vae. ‘Donald Trump’ mah a nuetapaw chinaw khe NewYork-Presbyterian sizung lang khe lah cceih zah a nuetapaw te a vah tungku ung hae.
Thungpa lahtu hae mah White House ato langte ngawbia hae zah, Tan(casket) te thawkaw kyate oun rungkhae hae paw kha nynh a muih lang hae.
‘Robert Trump’ tuh ‘Donal Trump’ te uno hae hlu pangaw kyaze hlu kheih thuabua zah, ‘Donald Trump’ a upaw ‘Fred Trump Jr’ tuh kum 1981 kya khe a chih vae.
White House kya hynh President innbyn hae te uno vaeccaw hae nynh zuudy poi ccyh tuh leh mang he hae zah, rua ccykunaw tuh leh mang bang khyh hae, cite abang nynh ho hae.
White House kya rua ccykunaw lang a thangpaw phua ablyn tuh ‘Donald Trump’ nynh a sang ngaw cite White House kya rya lahtu paw nynh a ho.
