Zo Raetapaw 
Vaerang pui paw, Canada ccungccaw thua paw vae, saya ‘David Lah’ tuh Canada lang bua oun kii vae ngaw cite ‘Jeff King’, ICC president nynh May 19, 2020 khe Fox News kalang a ho. Saya David Lah tuh May 7, 202 nin khe Covid19 Quarantine umnaw kyate a pousah kou hae te tazae ccuenaw kha bua a tungkii ung. Atu nin tazae ccuenaw kong langte abang thungpa tuh, David Lah hynh kum 3 cia thung a ccah kho cite a thang. Atu nin, ninthung nin hynh tazae ccuenaw kyate ccungccaw patae malang vae kheihnaw oun langsaku hae nin nynh thua.
May 13 nin khe saya David Lah te mihccang hae hlu thung blyn tuh kum 3 cia thung ccawsah lang cite kawbya nung hae, cite ICC (International Christian Concern) thungpa kyate a ho hae. March 13 nin Covid19 raeringku nawlan kawbya a nung kou hae te, ‘David Lah’ te aphu hae tuh Vaerang e “2013 Natural Disaster Management Law” kha a rawse hae cite tazae a ccue hae. Saya ‘David Lah’ phung honaw aphu kyama a umbua paw ccungccaw hae mihlu 71 a cih hae cite abang thungpa hae nynh a ho.
March saw a thangdyn saya ‘David Lah’ phung honaw kyaze; “Pachia bya na ngae oh paw ccungccaw hae kalang tuh Virus thua ngaw khyh cite Jesu min te ka siakhae” cite ‘David Lah’ nynh a ho. Tuh koute lonaw naw kheih laelang oun roo te, hlu 20 hang kha dang khyh hae keiccuze Covid19 kah sihse hae zah Positive kha a piah. Tuh ekya tuh saya ‘David Lah’ te Myanmar Rockstar te min thangpaw ‘Myo Gyi’ blyn a pangbua hae cite a umnaw kya-e hae nynh a ho hae.
Saya ‘David Lah’ thungpa thang miakawte Yagon e kaw hotu hae nynh vaekheih mawte viakalin kyng khyh hae. Covid19 keiccu Sizung kyakhe um zah, negative a piah koute mah innpaw-loopaw (neighbor) hae nynh innvaw lang kiisah lang a ry khyh hae keiccuze May 19 cia Hotel quarantine a um.
Atu ccyh kyama Canadian officials hae route saya ‘David Lah’ mah thaekunaw pou a hoi hae, atu e May saw thangdyn hynh ‘Canada offering consular service’ nynh mah saya ‘David Lah’ kha bungnaw a hoopaw ccazing kalang khe a phang hae. “Canada ccungccaw thuanaw te amaw konglan(case) hynh ccungccaw patae nynh mah pung a nyng khou vae apiaze, Vaerang accozah nynh mah a zoipaw deitanaw kha oun pya kho, thua khyh ze Quarantine blyn hoi te a thangsah kho keiccuze Canada lang mah a kiisah kho ngaw” cite ‘Jeff King’, ICC president nynh a ho.
Ref:
Persecution of International Christian Concern
