
Tahlu rang Wuhan myo kya umpaw Pastor paw ‘Luo’ tuh ccaccung nin taruh nin kya ninblyn te online Zoom kyate phung ho zah Pali hae nynh phe kyng hae. Nin taruh nin online kya suiluaku hae zah phung mangccia paw nynh Wuhan myo kya-e kawhoitu hae phe kyng hae cite ‘ICommitToPray’ aphu nynh a ho.
Ccungccaw hlu kheih te hlu kheih pyn te tungku leite online kyate tungku te nynh Tahlu rang e Kriccaaw hae mah ccyh a mang hae. Kriccaaw hae tuh a hoipaw rya lawky lang mih hiinnaw cia bya lang sah leite um hae salama Tahlu Pali hae nynh tuh a hoi leipaw ccungccaw hae langte nynh hung muih hae cite International Christian Concern(ICC) kalang ‘Luo’ nynh a ho.
Covid 19 keiccu Wuhan myo kya vawsaw myasaw um lya, Kriccaaw hae nynh myo halan vah cihtu mah rya a law hae ciipaw kha, Pastor ‘Luo’ nynh cceikia ae muihsah vae oh cite Pali kha ‘Chinese Christian Fellowship of Righteousness’ aphu nynh mah a ho.
Tuh koute Pastor ‘Luo’ nynh, “Kae nynmah azii cih langte bua ka hopya hae, kae tuh Jesu Kri halan nynh pouh ka hiin ngaw. Ccaccangpaw kong langte bya ka lung ngaw khyh. Thuasalam Pachia thehooypaw bya honaw kong langte tuh ka lung ka rulaeku ngaw khyh, ka thawzung thang ngaw khyh.” cite a ho.
Atu hawte Pastor ‘Luo’ kyngpaw hae hynh, Tahlu accozah nynh “The Chinese Communist Party (CCP)” te “Xi Jinping” tungvaw lang ccungccaw miakaw nynh kaw na ngae cih oh, cite bya a nung keiccu nynh thua cite ‘Rev. Jonathan Liu’, the founder of “Chinese Christian Fellowship of Righteousness” nynh Fox News kalang a ho.
“Xi Jinping” nynh kaw phe ae mue tetuh Tahlu accozah nynmah Tahlu Kriccaaw hae hynh babang vawsaw pya vae hae. Kriccaaw hae beikinn blyn ropya hae zah, Pastor hae blyn houhouh kyng vae hae cite ‘Rev. Jonathan Liu’ nynh a ho. Dei tanaw aphuinphuin te a pya he vae hae, cite a ho.
Tahlu Kriccaaw hae halan sawsangpya myarya a ho, daebabi lang Pachia beihnaw ccyh mang kho khyh hae. Thein 700 han Tahlu Kriccaaw hae hynh inn kya pungkunaw khuin mue lakhyh hae. Anuhlang lonaw kya sang mah inn kya pungkupaw Kriccaw patae kha kyng hae zah, Kriccaw hae Vaelangtung blyn Tahlu accozah nynh marya ropya kou hae. Pastor ‘Luo’ a kyngpaw hae seeku zah malang sah vate mah oun thua ngaw cite Tahlu Kriccaw patae mah mih thing myarya phang.