Nin Kheih Suimala 9 Cia Game Zue Keiccuze Kum 6 Paw Ihmua A Mit Tharui Phe Dung
Zo Raetapaw 
Kum 6 paw ihmua, John Nathan Lising tuh nin kheih ze suimala 6 cia game zue keiccuze a mit phe roh zah, ngaw mah muih kho vae khyh. A mit mah karae pou moh zah ngaw muih kho khyh apiaze a mungtaroi blyn pou suiku. Tuh e cciinaw tuh x-ray (datman) te khung hae zema paw cciinaw mah thua ciipaw hoite nyh kho khyh hae. A luboih tuh amaw minte mang hoi cite mang hoi, hoite rya mang lah cii hae.
A nung te a paaw hae nynmah siizung patae kalang cciakhae hae zema hoihua kho lakhyh. Lonaw naw kheih lae a ro vae te mah a hoihuanaw langku lakhyh. Atu tuh Phone hae, computer hae mah mang vae khyh salazema a hoihuanaw a langkuh khyh apiaze a mae blyn minit 20 te 30 cia ccadah ccadah pou suiku ung. John Nathan Lising tuh Philippines rang, Nueva Ecija kya a um paw nynh thua.
John Nathan Lising mah atakaw lya tuh myarya ngedang paw nynh thua cite a paw Edgar te a nung Judee nynh ho hae. Game a zue zema a hoi leipaw game thua leite ihmua hae halan a hoipaw game nynh a zue he cite ho hae. Inn vawlan oun thua vae ze suimala 3 te 9 cia game kha babang leih zue he, cite a paw nynh a ho. Atu hawte nyng leipaw cciinaw oun langku ngaw cipaw tuanaw kae vah hoi khyh cii hae.
Game zue paw ihmua hae hynh rikhae lang myarya ung, game keiccu thua leite phone screen kha asae do hae keiccu nynh thua cite sayawan (Doctor) paw nynh a ho. Phone mah thuasah, Computer mah thuasa, TV mah thuasah asae eih do lang ze ccungccaw luboih blyn a rohsah kho cite sayawan (Doctor) paw nynh a ho.
Phone, Computer, TV mah thuasah a ccyh eih sae lang do paw, mang paw kyalya te mah thua khyh, Phone hae, Computer hae, TV hae amae (screen) eih awtu lang zema thuasah, eih naeku te do lang zema thuasah, mit te luboih blyn rohnaw myarya a lang cite sayawan paw nynh a ho.
Atu she vae ze nungpaw patae hynh mih ccaaw hae kha phone te computer te nynh a suibiathya he hae. Zuekhae mah hua vae khyh hae zah phone te nynh mih ccaaw hae kha a zuesah vae hae. E hynh ihmua hae halan rii lang myarya um paw ccianaw nynh thua. Langmaw lya e nungpaw hae tuh mih ccaw hae kha uhcccaw ccang khakheih te nynh a zuekhae he hae, mih nung hae nynmah hlaw sahpya te, lawkhae te nynh ihmua hae kha a suibia he hae cite Zo nungpaw hae nynh ho hae.
Langmaw lya e nungpaw hae tuh mih cccaw hae kha phungpaw konglan mah hopya he hae zah, mih ihphae langte zema phungpaw konglan kha a hopyathya he hae. Baebuccaw kya-e phungpaw blyn hopya hae zah mih cccaw hae kha a ngawsah he hae. Atu she tuh nungpaw hae mah mih ccaaw hae kha bya hopya lang mah hua he vae khyh hae. Phungpaw hopya langpaw mah nyh vae khyh hae zah mih ccaaw hae kha ccangpyanaw elan myarya ru vae cite nungpaw hae nynh a ho he hae.
