Thai Rang E Bawlung Sytu’ae Ihmua Luh 12 te Ccangpyatu Paw A Kung Kou hae te Ngaethyanaw
Zo Raetapaw 
Thai rang e bawlung sytu’ae luh 12 te ccangpyatu paw tuh ngedang te poukhae kou hae salamah ngaethya lang bua um paw tuh, mihmin a khungtu paw luh kheih tuh phe a chih keiccu nynh thua. Bawlung sytu’ae luh 12 te ccangpyatu paw tuh sizung kya nin 3 cia a dochui kou hae te ngedang te a um hae cite sazaewanpaw nynh a ho. Mihmin tuh ngedang te um hae salamah a khungtu paw “Saman” tuh phe chih keiccuze bawlung sytu’ae luh 12 te ccangpyatu paw mih lung paw kho khyh. Mih mitphi lua te a khungtu paw, tuikaw teetu paw “Saman” kha mih luh bakhung hae zah sawtuanaw a pya hae. Tuikaw teetu paw “Saman” sakhung kha soi hae zah sawtuanaw a pya hae.
Bawlung sytu’ae ihmua 12 te ccangpyatu paw tuh bawlung sy kou hae te lungkarung kalang a vah tee hae. Tuh nin ccyh kya tuh khua nynh rah zah, laemuin nynh phe vah tingkaw hae. Tuh koute vah ccue hae zah mih laanpi blyn laemuin nynh phe vah tinkhawku vae. Tuh koute nynh mih laanpi kha phe vah vaee vae hae.
Bawlung sytu’ae ihmua 12 te ccangpyatu paw tuh;
  Chanin Vibulrungruang (Min konaw: Titan), Kum 11Â
Titan tuh mih phu (Wild Boars football club) kyaze a suihuacceipaw nynh thua zah, bawlung sypaw phu (Wild Boars football club) kalang a teebua mawze kum 7 te bawlung a vah sy paw vae nynh thua.
 Panumas Sangdee (Konaw: Mig), Kum 13
Mig tuh myarya phialah zah nuhlang (Defender) a umtu paw nynh thua.
 Duganpet Promtep (Konaw: Dom), Kum 13
Dom tuh bawlung synaw kya tuanaw myarya hoi zah, ccungccaw mah myarya tuheithya.
 Adul Sam-on (Konaw: Adul), Kum 14
Adul hynh Vaerang ccungccaw thua zah, mihmaw te mihmaw ukunaw khuin muenaw Wah Pyine (Shan rang) kya pui paw nynh thua. Amaw tuh sia-inn hoi te kae khylan,Thai rang lang a vah cceih paw nynh thua. Adul tuh Thai, Burmese, Chinese and English bya hae blyn kha a ho kho paw thua zah, Tuikaw teepaw British paw te a tungku takaw nin hae kya mah a vah beiku kho paw hae nynh vah thua. Lungkarung lungkhu kya a um lya hae mah a nung te thungpa thaeku hae te, a nung nynh mah sawsang te kae lah bung cih cyipya zah, tungku mah myarya kae ry a cyipya. Adul hynh bawlung synaw kya zema myarya thya paw luh kheih nynh thua.
 Somepong Jaiwong (Konaw: Pong), Kum 13
Pong hynh mah a ditaraw mawte bawlung sy lang myarya a lung vah thua paw nynh a vah thua.
 Mongkol Booneiam (Konaw: Mark), Kum 12 or 13
Mark hynh mah sungsah lang myarya um zah, ccungccaw mah myarya lungpaw umsathya paw nynh thua. Mark hynh mah Vaerang langte Thai rang lang mih nungpaw hae route a vah nueku paw hae nynh thua.
 Nattawut Takamrong (Konaw: Tern), Kum 14
Tern tuh a nung te a beiku lya hae mah a nung elang kha na thing vah phan nang sah a cyipya. Mih nungpaw hae nynh mah kae pei ngaw khyh na thing vah phang nang sah a cyipyaku hae.
 Peerapat Sompiangjai (Konaw: Night), Kum 17
Night tuh a pui nin, birthday ccyh vah thua zah, a puinaw birthday tuaku langte aepaw hae te moh hae blyn lungkalung kalang a phukubia hae. Night tuh a bya mah eih lungthya khyh zah, bya mah alung eih hothya khyh. Thuasalama a hoiccaw hae kha myarya sungsathya hae.
 Ekarat Wongsukchan (Konaw: Bew), Kum 14
Bew tuh koi (Goal Keeper) ngawtu paw thua. A nung te a beiku lya hae ze, a nung elang kha lungkarung kyate kae pou kou te uhccaw na zuanaw kya kae bung vae cih a cyipya.
 Prajak Sutham (Konaw: Note), Kum 15
Note hynh myarya daebabi paw nynh thua, thuasalama bawlung zuepaw hynh myarya a lungry thua paw nynh thua.
 Pipat Pho (Konaw: Nick), Kum 15
Nick nynh a nung kalang ccaw a ky lya ze, lungkarung kyate ka pou te Mookatha lang ka ccia ry a cyipya hae. A Nung te a paw, a uno blyn myarya kae sungsah oh a cyipya hae.
 Pornchai Kamluang (Konaw: Tee), Kum 16
Tee tuh nuhlang a umtu paw nynh thua. A nung te a beiku lya hae ze, nae thing lah phan nang oh, mang ka dang a cyipya hae.
 Assistant coach Ekapol Chantawong (Konaw: Ake), Kum 25
Ake tuh aditaraw nin te Vaerang pui paw thua zah, bawlung sy mawze Buddha Phungki langte sya a tang bang paw nynh thua. Phungki lang a tang lyaze pawte mah ae leite asae um kho lang ciipaw blyn a ccangku paw vae nynh thua. Bawlung sytu’ae ihmua nungpaw’ae kalang mah ccaw ky hae zah, ihmua hae lungkarung kalang ka teekhae keiccu hae ze beih ae lah ngaethya oh cite a ngaeku hae. Ihmua nungpaw hae nynh mah kae seisah ngaw khyh nin a cyi hae. Amaw nyh mah lungkarung lungkhu kyama hoi te ka lah dooih cih hae cite mih nung hae kalang ccaw a ky hae.
