Zo Raetapaw 
SpaceX (vawlae kalang cceihtu’ae aphu) nynh vawlae kalang zysah lang ci hae paw dungpian (rocket) tuh, atu saw nin kheih nin awkhua kya phe paw zah, mae lang phe rua. Maw muihpaw ccungccaw tuh um khyh cite “SpaceX” aphu nynh a ho. Maetui (fuel) ruin mangccia hae paw kya nynh “dungpian” (rocket) tuh phe paw zah, pawkeiccu mah a paw cipaw tuh nyh kho lakhyh hae.
Tuh e “dungpian” (rocket) tuh “Facebook” kya mang lang cite paccyngpaw hae “Cudoh” (satellite) phupaw nynh thua. Tuh e “Cudoh” (satellite) kyate Laephi vawlang ccungccaw patae nynh mang hae paw Facebook hynh Africa, Europe te Middle East (a ngaelung nintua langsa) rang hae kya mah khinlei mang kho nawlan cite a paccyng paw hae “internet line” ccangkheih nynh thua. ‘Tuh internet line’ tuh “Facebook” nynh a makhae te mang lang cite a paccyng paw nynh thua.
Facebook hynh “French Satellite Firm Eutelsat Communications” te ryalaw lahkheihbua nynh thua. “Amos6” cikupaw Cudoh (satellite) tuh “Israeli company Spacecom” nynh a huepaw nynh thua. “Facebook” internet halan paccyng paw “dungpian” ropaw tuh ka ngae myarya thah cite, “Facebook” raetupaw ‘Mark Zuckerberg’ nynmah khua a ccungnaw kyate a holang.
Tuh e “Cudoh” (satellite) tuh laephi vawlang rya lawnaw halan te ccungccaw zapi thaekunaw halan myarya oun bung cih paw nynh thua, cite “Facebook” raetupaw nynh a ho. Thuasalamah accangpaw “technology” thyapaw ccungccaw bungtupaw’ae ka hue ung. “Facebook” halang mang lanpaw “Cudoh” tuh ccungccaw’ae halang a thua khonaw ryacia poo kae zuaku cih cite Mark Zuckerberg nynh a ho.
