USA kya Nupi te Nupi, Pise te Pise Zuvaw lang Tangnaw Khuin

Zo Raetapaw July 3, 2015 2 min read

Laephi vawlan, phing lokupaw (nupi te nupi, pise te pise) zuvaw lang tangnaw khuin paypaw rang patae a cih vae. June 26, 2015 nin te USA mah phing lokupaw zuvaw lang tangkheinaw khuin paypaw rang’ae kya ze rang 21 naw kya um zah, myarya zema a min thahua cceipaw rang lang oun tang. Phing lokupaw zuvaw lan ame te tang khonaw elan a zuaku hae paw tuh myaryamaw mih lung paw hae zah, teenaw poi cia a tuaku hae.

     USA president Obama nynmah a zuakutupaw’ae kha phone kyate, “Congratulation” (Teenaw na mue oh) cite a beih lang hae. White House (usa inn rawpaw) kyate mah President Obama nynh, “America ccungccaw’ae (Americans) myarya lungleekhaeku lang a ccang, pawccei cize ccapyhtarih paw rawthungnaw ryalaw nynh rang ablyn kha ‘Sungsakunaw tuh Sungsanaw nynh thua’. cite a thaesathya.” cite a ho.
Phing lokupaw zuvaw lang tangnaw khuin tuh mue vae salah zema malang oun thua cihpaw Beihnaw (religion) konglan te piaccana bua um ki ung. Beihnaw patae nynh mah leihkhang khyh hae zah, abang tuh thawzung pya mah bua um ki. Kriccaw patae nynmah Zuvaw cipaw tuh pise te nupi umkheihpaw nynh thua, cite a eipaw mah a um. Pise te pise, nupi te nupi umkheihpaw tuh seinaw nynh thua, a nyngsiikupaw nynh thua cite patae a ho hae.
USA kya umpaw Kriccaw buu patae nynh mah rawse hae zah, abang tuh zudy poi raepya kho thua khyh cite a ho hae. Kriccaw beiknaw kyaze a lunghua nynh ry khyh hae salah zema a buu lungku maw pise te pise, nupi te nupi zuvaw lang tang rypaw patae a um hae. USA kyaze buu leepaw thuapaw Episcopal Church tuh  beiknaw inn kyamaw phing lokupaw zuvaw zudy poi mah tua pya a thua cih cite phe ho vae. Epscopal Church tuh laephi pyngpi kyaze Anglican Communion te kyngkupaw nynh thua. Episcopal Church mah phing lokupaw zuvaw tangnaw khuin kya thawzung pyatu abuu lante atulya myarya a min thang.