A Chia hae paw Kachin Sazaema Lu ning Rua muapaw/ Ruvaw kaepaw Mihlu Thungkhuin lae Cih hae
Zo Raetapaw 
Sazaema rya bungtu Kachin sazaema lu ning’ae rua sungkunaw kya rua muapaw/ruvaw kaepaw mihlu thungkhuin lae cih hae cite Myitkyina Myo khuaccaw’ae nynh ho hae zah, abang nynh tuh athung sungthung lae cih hae cite a ho hae.
Sazaema lu ning’ae rua sungkunaw te sawsangnaw poi tuh January 23 nin Myitkyina Myo, AD 2000 Jubilee Hall kya raepya hae zah, khuaccaw lalyh thungkhuin han cih hae, tuh koute khua ccaccang lante oun thua hae paw te beiknaw lante, nanngainyee lante, lomuyee lante oun thua hae paw mah phe lung hae. 88 Siaihmua Aphu (၈၈ မ်ဳိးဆက္ေက်ာင္းသားမ်ားအဖြဲ႔) kyate Ko Myat Aye te hoiccaw’ae, te Yangon Myo kya-e Nupi Aphu (အမ်ဳိးသၼီးအဖြဲ႕) kyate Naw Susana Hla Hla Suu blyn Kachin Sazaema rua sungkunaw kya oun thua hae.
Sazaema ryalaw bungtu Kachin sazaema lu ning’ae tuh Kachin rang kya tanhaw (10th Standard) sia-inn a thangsah vae hae paw nynh thua. Lu kheih tuh kum (20) cih zah lu kheih kum (21) nynh nynh cih ung hae. Kachin Baptist Church (KBC) kyate Sazaema rya lawsah lan cite Shan rang (Shan State) kya-e Kawnghka-Chubuk khua lan a saw hae paw nynh thua.
Sazaema lu ning’ae tuh Kawnghka-Chubuk Christian Church eria lungku e inn taraw kya um hae zah siaihmua’ae ccaw ccangpya hae paw nynh thua. Sazaema lu ning’ae a chinaw hae tuh mih inn taraw lungkhu January 19 nin khuazi ccyh kya nynh thua. A chi nin khuazi ccyh kya tuh a naekuhuapaw innpaw nung lu kheih nynh a sia hae paw roi kha vah thae paw te vah cceih zah, Sazaema’ae inn thawkaw kha vah khuatua tuh paw roi mah vah thae vae khyh zah innvaw lan bua vah ki. Awkhualan khuadae tuh siaihmua’ae siainn lan vah thua hae tuh sazaema’ae vah thua vae khyh hae zah, mih inn lan vah dotua hae tuh lu ning mawte phe chi vae hae paw kha nynh vah thuanua vae hae.
Sazaema lu ning a chianaw’ae konglan te khuaccaw’ae te rhawkaw’ae blyn seihse hae zah, Sazaema lu ning’ae mih rua tuh seihse (autopsy) khylan Muse Sazongpi (Muse Hospital ) lang a ky hae. Tuh e khua kya tuh Vae rhawkaw’ae nynh thua hae zah zii ning rya vae hae. Tuh e rhawkaw’ae tuh (Kha-Ma-Ya 503) aphu’ae nynh thua hae. Tukeiccuze Vae rhawkaw’ae nynh thua ngaw hae cite a tuase hae. Sazaema lu ning’ae tuh mih lu te mih pyng blyn cceihzong te sua hae zah, a dydae hae cipaw kha a muih hae. January 21 nin kyatuh tuh e khua kya upaw (Kha-Ma-Ya 503) rhawkaw mihlu 100 koute mihlu 60 bua oun biachuih hae zah khuaccaw’ae blyn mih ri mih kaw phe thua cite ho hae. Khuaccaw’ae te rhawkaw’ae blyn a seihse hae paw te rhawkaw’ae nynh Tamada Zong (President Office) lan ccaw ky hae zah, “Rhawkaw’ae hynh masaty seihsenaw na raeleinaw lan oh kae thaesah oh” cite ccaw a zei/pya hae cite thongpa blyn a pou.
.jpg)
Kachin Sazaema lu ning chinaw kong lante ahmepaw a poukhae nawlan hae cite Vaerang e Siaihmua Aphu kyate thozah, Nupi Aphu, ccungccaw patae blyn nynh mah sandah pia hae (protest). Madalay te Yangon lancia sandah pia hae zah, abang tuh ngaenawlan cite haetapaw oun ccyng hae zah Sazaema lu ning halan ccyh a mang hae.
US nynmah Kachin sazaema lu ning kong lante ahme te na seihse cih oh cite Vaerang (Myanmar) uktu’ae kha a hopya hae. Vaerang e mah “Pawcce mah E konglan hynh a thua cipaw hynh kae ccung mangccia ung.” cite nyn oun hopya hae cite State Department Spokeswoman Jen Psaki nyn a ho.
Ref: http://www.foxnews.com/s-calls-for-myanmar- killings-2-ethnic-kachin-women/
http://www.theguardian.com/world/2015/jan/22/us-burma-investigate-deaths-teachers
http://7daydaily.com/story/30194#.VMN_gv7F98E
http://burmese.kachinnews.com/news
http://www.kachinnews.com/news/2724-alleged-army
