Zo Raetapaw 
Australia, New South Wales State, Sydney city kya Australia Pali’ae tuh Lindt Cafe inn lungkhu kya ccousei ccungccaw’ae te rhaw tuku hae zah Chih lante oun pyakupaw ccungccaw lu kheih tuh maethei te kaw hae zah phe chih. Tuh ekya tuh azyahuaccei ccungccaw lu takua cih hae zah, maethei kyngtupaw tuh daki/anki thaawpaw (thick) amangpaw nynh a lawku cite ho hae. Zakheih laepaw Pali’ae kyatuh mih kuit dingpaw (sniper) maethei kyngpaw’ae blyn umbua hae zah, Ninkheih Nin awkhua 10:00 am kya khe The Lindt Cocolate Cafe inn (laphatui san) kha a kuiloih hae.
Tuh e a kawkunaw hae kya tuh ccungccaw abaa tuh a chih kho hae, maw mah muih kho cite thongpaw lahtupaw’ae (Media) nynh ho hae zah, Pali’ae klante tuh ho lakhyh hae. Maethei kyngtupaw, ccouseikupaw mah pawte mah athua cipaw mah ho lakhyh hae zah, Pali’ae mah maw muihpaw a um, um khyh cipaw ho lakhyh hae.
Thongpa lahtupaw’ae azyahuaccei lu 13 a cih ngaw hae cite ho hae zah Pali’ae nynh tuh ho lan phe mya hae. New South Wales State kyaze Police Deputy Commissioner thuapaw Catherine Burn nynh tuh mihlu 30 te akaw lan nynh a um cih cite a ho.
Tuh e ccouseikupaw ccungccaw’ae tuh amangpaw alan (flag) kha kyng hae zah, tuh e alan (flag) kya tuh Arabic ccaw te a pyakupaw/zeikupaw a um. Tuh e ccaw tuh “Ccangpaw Pachia Um khyh, Pachia te Pachia Profeh(Prophet) thuapaw Mohammed kyalya nynh UM” cikupaw ccaw nynh thua.
