Zo Raetapaw 
Thai rang kya vae kheihnaw nupinung Mis. Yingluck Shinawatra kha Prime Minister (MP) lan a ponaw hae liate Vae rang ukkunaw kya nupi ae’ mah thawmuing lan myarya a um cite rang ukkunaw kya cciakhaetu Vae nupinung nynh a ho.
Khua innpaw, Thai rang kya-e khoccaw ae’ nynh naw ccawnaw liate Mis. Yingluck Shinawatra tuh vae kheihnaw Nupi Prime Minister lan tangpaw tuh lungtua te kae cciadue zah khua innpaw rang ae’ te mah vaeccawkunaw houhouh hooy kho nawlan rya oun laah kho cih cipaw tuanaw kae hoi cite Yangon umpaw Democratic Party kya-e Secretary Daw Than Than Nu nynh a ho.
“Khua innpw kya nupi nynh Prime Minister a mue kho paw tuh rang ukkunaw kyaze lungtuakhaeku lan myarya um. Ahmaw rang kyamah Rhawkaw Accozah uknaw thua vae khyh keiccuze nupi cciakhaetu ae’ mah malang oun pou kho vae cih cipaw ngaehoinaw ka hoi” cite bua a ho.
A kum 44 cihpaw, ihmua luh kheih kyalya paw a nung Mis. Yingluck Shinawatra tuh rang ukkunaw kong lante a sekuhbuapaw thua khyh slama rang kong lante Dikari(Degree) lahpaw luh kheih nynh thua. Karankunaw te detah hae zah rangccang poupaw Prime Minister ryngpaw Thaksin Shinawatra a ccianung, a soihuapaw luh kheih nynh thua. Amaw tuh rang ukkunaw kya a teebua koute lonaw naw (6) lungkhu kya Prime Minister lan tangpaw nynh thua.
Vae rang Democracy cciakhaetu Daw Aung San Suu Kyi nynmah Mis. Yingluck Shinawatra nynh Pokunaw(Election) kya taenaw a muepaw tuh lungtua te ka duehaw zah Vae rang te vaeccawkunaw mah houhouh oun hooyhua cih, Thai rang lungkhu umpaw Vae ccungccaw vawsaw tungpaw ae’ hanlan mah ngaethya sungsanaw phe ccing lante ae dooihpya kho nawlan mah ka peki cite a ho.
