Zo Raetapaw 
“A nuhlang lya nawtaw nin te nawpi nin kya khuazi khuadae khopi a thua keiccu atu hawte due ae’ mah roh zah laephi mah a tin” cite a ho.
1977 kum lya mah atu hawte khopi thua boi zah inn, laanpi te due ae’ mah patae a lah roh boi. Tedim Myo kya abapi mae lawnaw, Zalwin vawkhu tui a lee keiccuze mae te tui lawnawpaw tuidung(pipe) balyn pong roh zah Tedim myo kya ae lanpaw tui a mue khyh naw hae te mawtaw, bus ae’ mah a ccue kho khyh naw, naw kheih a cih vae cite kholae ae’ nynh ho hae.
Atu ccyh lya hynh khua raw vae khyh zema laanpi te due ae’ hynh bua raethui kho a thua lakhyh keiccuze khocce mah cceihkuthya khyh, vawkhu e tui mah di lakhyh cite ho hae. A rohpaw due ae’ tuh Zalwin, Luelo, Haicing,Ngaccan, Laibung, Bungzan, Tuiza, Hanccah, Khuaccaw, Sitan te Fuanlol nynh thua hae. Tedim laanpi e Suanpi khua kya zema laephi tin keiccu inn (8) roh zah Thangnuang khua kya zema inn (12) a roh cite ny lan um.
Zo rang Myopi ae’ Hakha te Falam kyatuh a rohpaw uhccaw um khyh ci hae. Thuaslama Kalay Myo kya zema khua rah zah Leisaw vaw a lee keiccuze Kalay Myo Aungmingalar te Aungsape zakuet kya inn (125) han tui nynh a thei. Leisaw vaw pepang e lei ccatang patae tui nynh a cciakhae ci hae. Kalay Myo te Zo rang lan ccuepekunaw abapi due ccang ning mah tui nynh cciakhae zah phe roh cite ny lan bua um.
