Accozah Siainn kya KIO Siaihmua Ae’ Praveit Ccaw Ccangkunaw a Khawpya hae
Zo Raetapaw 
1994 kum awtuhnaw daenaw rae kho kou hae te Kachin Independent Organization(KIO) kyate tan (10) siaihmua ae’ kha Accozah siainn te kyngkuh hae zah praveit(private) ccaw ccangkunaw kaw muepaw mih siainn kha atu tuh marya khawpya/rohpya vae hae.
KIO te Accozah rhawkaw daenaw rae kou hae te kum (16) cia KIO tan (10) siaihmua ae’ tuh Myitgyina Myo No. (1) kya khe praveit(private) ccaw ccangkunaw te ccaminpoi phinaw kaw kha a muepaw hae nynh thua. Kum takyh August sah leihpaw khe KIO tan (10) siaihmua ae’ tuh Myitgyina Myo kya siainn kae lan a thua he hae.
Atu kum tuh June saw kyate kae lan cipaw Sazaeciipaw nynh thae sah hae slama rhawtuh so keiccuze thua kho khyh hae cite Hlaizar Myo kya-e sazaema Hla San Thuh Khung nynh a ho. KIO siainn tuh Rhawphu No. (1) kya Inkuinla High School, Rhawphu No. (3) kya Maijarzar High School, Shan Pyine Rhawphu No. (4) kya Lwekan High School te Rhawphu No. (5) kya Hlaizar High School cite ablyng siainn ccang (4) a um. KIO tan (10) siaihmua ae’ tuh tan (9) ccaw bua phi kou hae te a aawpaw ae’ kha nynh Accozah tan (10) ccaminpoi phinaw kaw khamah a mue hae. Atu kum Myitgyina Myo No. (1) siainn kya kaepaw KIO siaihmua ae’ tuh mihlu (50) lae a cih hae.
“Ahmaw mingphuin tuh ahmaw siainn kya kae lan, ccaminpoi mah phi lan. Ahmaw thyahawnaw kha kaethung sah lan. Vae rang e Dikari(Degree) law khyh zema paw tua um khyh. KIO kuit kaw e siainn te rangccang e siainn ae’ kyama kae kho thua. Rang daenaw rae kho khyh zetuh ccaw ccangkunaw mah a rulaekuh kho” cite KIO siainn boipaw Slankabang Sualuah Kin nynh a ho. Thuaslama Myitgyina Myo kya inn um khyh, phua um khyh keiccu siainn kae lanpaw mah vawsaw myarya um.
“Boarder umnaw kaw mue khyh hae ze, paw kya mou um lan? A ccangpaw Boarder inn tuh ccing (14) te ccing (20) thua. KIO boarder inn ccing (4) nynh thua. tuh e mawtuh ihmua ae’ taening khyh hae” cite Maijarzan sazaemaciinung Daw Luh Cia nynh a ho. Phua taeningpaw siaihmua ae’ tuh Mandalay te Yangon lan nynh marya a kae vae hae.
“Phua hoipaw ae’ te donghooypaw innbyng ae’ tuh Myo leepaw kalan kae vae hae. E kya kaepaw siaihmua ae’ tuh phua taening leipaw ihmua makhae nynh a kae hae” cite sazaema Hla San Thoh Kung nynh a ho. Hlaizar High School kyatuh tan (10) kaepaw siaihmua mihlu (42) cih hae zah rhaw sonaw kyate oun ccuepaw siaihmua mihlu (25) bua oun thuachih hae, ablyng mihlu (67) a cih vae hae. Maijaizar te Inkuinla siainn ae’ kyatuh siaihmua mihlu (30) han a kae mangccia hae.
