Zo Raetapaw 
Thai rang, Chiang Mai Myo kya Poisaa ae’ nynh ihmua ae’ kha zuakuh hae zah minlae kalan hute phua ngiasakuh hae cite tua hae paw ihmua luh (6) kha Thai kaw hoitu ae’ nynh a khong kho hae.
Ccungccaw zuatu cite a tuapaw ae’ U Tin Ngwe (Kum 57), a zu Daw Shwe Kyi (Kum 54) te Daw Ma Cho Oo (Kum 47) ae’ tuh Chiang Mai Myo Metping Pali zong kya khe a khung/nung hae.
U Tin Ngwe tuh ccungccaw zuanaw, ihmua hute rya lawsanaw apiaze nupi ae’ kya uhhuanaw te ccazae ccoi thua cite Pali boipaw San Pin Tih Kyat Yeh nynh a ho. Tuh e konglan tuh atu chek kou thua vae zah byapianaw zong lan ky bua a thua cih cite a ho.
U Tin Ngwe tuh a puinaw Pakhu Tai thua zah Chiang Mai Myo kya rya haepaw a zu Daw Shwe Kyi kalan khe 2010 April saw kya nynh a thuabua.
U Tin Ngwe tuh nupi kya uhhuanaw kong lante ccazae ccoipaw tuh a mingtanung nynh a tungvaw kya a nge ry leinaw um keiccu nynh tuhte ccazae ccoipaw thua cih cite a ho.
Tuh e a khongpaw ihmua ae’ tuh U Tin Ngwe mawte vaeccaw kae tangpaw nynh thua cite U Tin Ngwe maw nynh a ho.
“Ka mingtanung tungvaw kyamaw tuhte ka uhhua lan thua ze kae tuh yn tahawpaw ccungccaw lanmah ka tang vae cih, oi tuh sangkaw mah a mee ka um vae ngaw khyh” cite U Tin Ngwe nynh bua a ho.
A khongpaw ae’ ihmua luh (6) tuh Innbyng te Ihmua Dooihnaw(Chiang Mai Shelter For Children and Families) inn kya khe khung hae zah U Tin Ngwe te vaeccaw tang ccaccing hae tah cipaw a chek mangccia ung hae cite tuh e Pali zong kya kaw hoitupaw Ms. Mingkhwan Weerachart nynh a ho.
A khongpaw ae’ ihmua luh (6) kha bya khia hae zah, phua a ngiasakuh hae ccyh lya khe ruinawpaw si phing kheih kha a dangbia hae cite Ms. Mingkhwan nynh a ho.
A khongpaw ihmua ae’ tuh a chek kou hae te Vae rang lan e mih vaeccaw ae’ kalan bua ky cih hae cite ny lan um.
Nuhlang saw kyamah Chiang Mai khazan, Hot Myone Cheknaw Sakoit (Gate) kya a zuapaw ae’ cite a tuapaw ae’ ihmua luh (15) khamah Thai kaw hoitu ae’ nynh khong hae zah mih vaeccaw ae’ kalan thaesah kou hae te rangri lan bua ky ki hae cite Ms. Mingkhwan nynh a ho.
Vae rang kya ccungccaw zuanaw eih lungpaw hynh phuaccungnaw a zya keiccu nynh thua cite Washington kya umpaw Ccungccaw Zuapaw Dounaw aphu nynh a ho.
Asia rang lungkhu hynh ccungccaw zuanaw um slama zema Thai rang kya hynh a lunghuanaw nynh thua cite World Vision aphu nynmah a ho.
Facebook Comments
