India Rhawkaw nynh Mara Regional Army cikuhpaw maethe kyngpaw cciakhaetu Luh kheih kyng hae
Zo Raetapaw 
India-Vae rangri Mizo Pyine, Lunglei Myo kya um hae paw India rhawkaw Arthan Ranphe nynh Zo mingphuin maethe kyngpaw Mara Regional Army(MRA) cikuhpaw cciakhaetu luh kheih July 13 nin kya phe kyng hae.
Maethe kyngpaw aphu luh (5) tuh Longtalai Myone Beimari khua kya a thua ccyh nin hae khe Lunglei rhawkaw Arsam Raphe(Raffle) aphu ae’ te phe tungkuh ae zah tu-e luh (5) ae’ cciakhaetupaw Pa Ceu (Ko Nai) kha phe kyng hae. Luh pali tuh phe ccue hae zah Pa Ceu tuh rhawkaw zong(station) lankhe a cciakhae hae.
Tu e MRA tuh atu kum Mara People Army(MPA) kyate pou hae zah Zo rang kyaze Paletwa Myo te Mizo rang kyaze Longtalai Myo lahku kya khe a cceih bungthong hae.
Pa Ceu te aphu ae’ tuh MPA aphu kyate a pou maw khe Zo rang blyng e khuaccaaw ae’ kha huunaw, ruhnaw, ahme leite rhawkaw mee khoinaw hae konglan kha lungnginnaw um kho khyh keiccu a poupaw hae nynh thua.
Tu e konglante seekuh zah “aphu ccianaw tuh kawngaenaw (discipline) hoi a hoo. Tu e kaw ngaenaw hoi vae khyh zetuh paryh rya lawkheih lanpaw tuh myarya ru vae” cite MPA honaw kaw hoitu luh kheih nynh a ho.
Aryng lyaze MPA aphu kya abang ryalawnaw keiccuze Mara mingphuin cciakhaetu ae’, beiknaw te mino cciakhaetu ae’ nynh a thadyng sapaw ae Mara Peace Commission nynh MPA kha kae naw ccah khyh cite 2010 July 18 nin khe ccaw ccang kheih pou sah hae.
MPA tuh Zo rang Matupi, Thangtalan, Paletwa Myo ae’ kya umpaw Mara mingphuin uknaw rang lungkhu khe san kheih lan um kho nawlan 2009 June 15 nin kya mihlu luh (20) te tho hae zah India rang maethe kyngpaw ae’ kalan khe rhawkaw ccintang kha a kae hae.
Facebook Comments
