Zo Raetapaw Konglan

Zo Raetapaw cipaw tuh Zo te Raetapaw poudepaw ming ccang kheih thua zah, Zo tuh Chin(ခ်င္း) cipaw nynh a thua. Langmaw se te masaty konawpaw min nynh thua. Abang Zo mingphuin patae nynmah atu cia a mang ung hae. Chin lae ze Zo cipaw hynh masaty te mangpaw min thua keiccuze atu zema mingphuin min takyh kya Zo cipaw min hynh patae a um ung paw nynh a thua. Bya loku khyh keiccuze abang tuh ccapyh a lae he. Se rulaekuh thyh te konaw mah rulaekuh zah Zo kyate Chin cite a ko hae paw nynh thua.

Raetapaw tuh Vae bya te thaungzalat(ေတာင္ဇလပ္) nynh a thua. Zotung kyamah konawpaw min patae a um. Thuaslama Raetapaw tuh alunghua nynh konawpaw min mah thua zah, khuaryng nung, paaw ae’ nynmah a lah konaw ty hae paw min nynh thua.

1. Raetpaw hynh phing ning um zah, pawse te pawraw nynh a thua.

2. Raetapaw hynh akuu neepaw thingkuh thua slama a umnaw ahmin hynh do lan ze ahanghuanaw mua kya nynh a um thya.

3. Thingku ae’ laku kya doo lan ze langkuhthya bua khyh slama a paw oun paw tetuh a langkuhuapaw haetapaw te thingku lan oun tang vae.

4. Khyse te khua nynh athaaw te ruu slama a kholiakuh cite um boi khyh, tynkring lang a poopaw thingkuh ccang kheih nynh thua.

1. Zo cipaw tuh Zo mingphuin enaw nynh thua.

2. Raetapaw tuh Zo mingphuin ae’ chiisaw te lungthing a langsakupaw lan thua zah;

a. Raetapaw pawse hynh mingphuin chiisaw(lungthing) hoinawpaw kha langsakunaw elan,

b. Raetapaw pawraw hyntuh athyaapaw lungthing te ahmepaw lungthing langsakunaw elan,

c. Zo mingphuin nynh a nyapaw mingphuin thua slama ahanghuanaw te ahooyhuapaw umnaw kya a um hae paw mingphuin kha langsahkunaw elan.

d. Thyanaw hawnaw zya slama ryalawnaw kyate a thae a paw hynh mingphuin takyh kya a langkuhpaw te a thangpaw thuanaw elan.