Zo Raetapaw India, New Dehli kya Refugee Ccungccaw Zo nung (kum 26) kha khuaccaaw India ae’ nynh a kyngde hae. Tuh e tuh bya hothya leipaw te nawruapaw Tedim nung thua zah, New Dehli kya a thuanaw saw (3) nynh cih ung.
(26,03,2011) 2:00 pm kya Nupi nung tuh a umnaw inn pe haetapaw khokhu kya khe a makhae te a um lya Kalaw ae’ lu (9) nynh aphinphin hyngpya te ko hae zah a kyngde hae.
“Nupinung hynh Innvah lan ka saw zah akonglan ka khiatua, amaw nynh hopaw tuh yn kyngde hae, anki yn khat hae zah saw yn khung hae. Tui yn sing hae zah anki bua yn ki sahku kou hae te haetapaw khokhu kalan bua yn saw hae a ci”, cite India e Chin Refugee Committee(CRC) Secretary paw Mang Pi nynh ho.
Tuh e konglan Pali ae’ kalan kaethe hae slama Pali ae’ nynh atu cia Nupinung kyngde hae paw kha kyng kho khyh hae, mih inn balyn (Nupinung nynh phe hopya hae), mang nyhpi hae te ahoyte kyng ry khyh hae. Paw lan eih riapya khyh hae.
Sizung kalan cciakhae te do sah tua hae zamah Sibawi hae nynh a kyngde hae paw thua khyh cite rarae mang nyhkuhpi te bua hyngkhaw hae. Tuh keiccuze Pali ae’ nynh “na kaethenaw opaw hynh zya dae oh” cite kalaw ccaw te zeikupaw ccahnaw kya khe sethuh sah hae zah zya dae sah hae.
India, New Dehli kya Chin Refugee ablyng te 20,000 loukaw um hae zah khuaccaaw ae’ nynh kyngde hae paw te a bua/zia hae paw kou lung vae cite ho hae.
Tuh hawte cyikupaw konglan Pali ae’ kalan kaethe hae slama Pali ae’ nynh ahme te ryalawpya khyh hae zah paw lang mah riapya khyh hae.
“Dehli kya um hae paw Vae Refugee ccungccaw ae’ tuh khyngnaw a um khyh piaze, Pali ae’ kalan kaethetua lan zema Pali ae’ nynh Pawpe eih ki khyh hae” cite Mang Pi nynh bua a ho.
Facebook Comments
